Флориан Плеттенберг маълумотига кўра, "Байер" ҳимоячиси Жарелл Куанса 2027 йилда катта трансфер курашининг марказида қолиши мумкин.
Англия терма жамоаси футболчисининг келаси йили Бундеслига клубини тарк этиш эҳтимоли юқори. Манбага кўра, бу йўналишда аллақачон яширин жараёнлар бошланган.
Куансага Англия Премьер-лигасининг "Челси", "Арсенал" ва "Ливерпуль" клублари қизиқиш билдирмоқда. Шунингдек, "Реал" ҳам футболчини жиддий кузатиб бормоқда.
"Ливерпуль" ўз академияси тарбияланувчиси учун курашда маълум устунликка эга. Мерсисайдликлар 2027 йил 15 июнга қадар амал қиладиган 70 миллион евролик қайта сотиб олиш бандига эга.
Шу боис, агар Куанса ёзги трансферлар ойнасининг дастлабки икки ҳафтасида кетадиган бўлса, унинг эҳтимолий нархи 70 миллион евро атрофида бўлиши мумкин.
Шундан кейин эса "Байер" футболчи учун анча юқори сумма талаб қилиши кутилмоқда.
