«Комо» бош мураббийи Сеск Фабрегас Италия А Сериясининг 6-туридан ўрин олган «Рома»га қарши учрашувдан кейин жамоасининг ҳаракатларига баҳо берди.

Мазкур баҳс 0:0 ҳисобидаги дуранг билан якунланди. Учрашувнинг 53-дақиқасида «Рома» ҳужумчиси Дониэлл Мален майдондан четлатилгач, «Комо» сон жиҳатидан устунликка эга бўлди.

«Майдонда ҳар икки жамоа 11 нафардан футболчи билан ҳаракат қилган вақтда бу «Рома»га қарши ўтказган энг яхши ўйинларимдан бири эди.

Якуний натижадан афсусдаман, аммо жамоамизнинг ўйини яхши чиқди», — деди Фабрегас DAZN нашрига берган интервьюсида.

Испаниялик мутахассис рақиб бир киши кам бўлиб қолганидан кейин шогирдлари устунликдан етарлича фойдалана олмаганини ҳам таъкидлади.

«Биз сон жиҳатидан устунлигимиздан, жумладан, тўпга эгалик қилишда ҳам унумли фойдалана олмадик.

Сабрлироқ ҳаракат қилишимиз ва тўпни тезроқ узатишимиз керак эди. Жамоамиз ёш футболчилардан ташкил топган.

Шунга қарамай, рақибнинг қарши ҳужумларига йўл қўймадик. Бу жиҳатдан ҳаммаси яхши ўтди», — дея қўшимча қилди «Комо» устози.

Ушбу дурангдан кейин «Комо» 11 очко билан Италия А Серияси турнир жадвалида олтинчи ўринни эгаллаб турибди.