Лондоннинг «Арсенал» клуби уч нафар етакчи футболчиси билан шартномаларни узайтириш бўйича фаол музокаралар олиб бормоқда. Бу ҳақда TEAMtalk нашри хабар бермоқда.

Манба маълумотига кўра, «канонирлар» бир неча ойдан буён Деклан Райс, Мартин Эдегор ва Юрриен Тимбер билан янги келишувлар юзасидан музокара ўтказмоқда.

Ҳозирча томонлар ўртасида янги шартномалар имзоланмаган. Бироқ клуб раҳбарияти ноябрь ойидаги терма жамоалар ўйинлари муносабати билан юзага келадиган танаффус давомида ушбу масалани тўлиқ ҳал қилишга умид қилмоқда.

Қайд этилишича, ҳар учала футболчи билан ҳам келишувларнинг асосий шартлари муҳокама қилинган ва фақат якуний тафсилотларни келишиб олиш қолган.

«Арсенал» раҳбарияти муҳим футболчиларини узоқ муддат жамоада сақлаб қолиш орқали таркиб барқарорлигини таъминлашни мақсад қилган.

Маълумот учун, Англия Премьер-лигасининг дастлабки олтита туридан сўнг «Арсенал» 15 очко жамғариб, мусобақа жадвалида иккинчи ўринни эгаллаб турибди.

Лондонликлар пешқадам «Манчестер Сити»дан уч очко ортда қолмоқда.