«Арсенал» бош мураббийи Микель Артета УЕФА Чемпионлар лигаси доирасида «Лилль»га қарши ўтказиладиган учрашув олдидан франциялик ҳужумчи Оливье Жиру ҳақида фикр билдирди.

Айни пайтда «Лилль» шарафини ҳимоя қилаётган Жиру 2012–2018 йиллар давомида «Арсенал» сафида тўп сурган ва ўша даврда Артета билан бир жамоада ўйнаган.

Испаниялик мутахассис собиқ жамоадошининг инсоний фазилатлари ҳамда Лондон клубига қўшган ҳиссасини юқори баҳолади.

«Аввало, унинг характери ажойиб эди. У жуда яхши инсон бўлиб, у билан бир кийиниш хонасида бўлиш ҳамиша ёқимли эди.

Жиру «Монпелье»дан жамоамизга келган пайтни яхши эслайман. У келиши билан ўйинимизга бутунлай янгича жиҳатлар олиб кирганди.

У биз ўрганиб қолган футболчилардан тубдан фарқ қиладиган, бутунлай бошқача услубдаги ҳужумчи эди.

Унинг қандай ажойиб фаолият олиб борганига бир қаранг. Жиру эришган барча ютуқларига, шубҳасиз, муносиб», — деди Артета.

Маълумот учун, Оливье Жиру фаолияти давомида «Арсенал»дан ташқари «Челси», «Милан» ва бошқа клубларда ҳам тўп сурган.

Эндиликда тажрибали ҳужумчи «Лилль» таркибида собиқ жамоасига қарши майдонга тушиши мумкин.

«Арсенал» ва «Лилль» ўртасидаги Чемпионлар лигаси учрашуви 13 октябрь куни Лондонда бўлиб ўтади.