«Манчестер Юнайтед»нинг собиқ дарвозабони Петер Шмейхель молиявий қоидаларни бузганликда айбдор деб топилган «Манчестер Сити»га нисбатан кескин жазо чоралари қўлланиши кераклигини билдирди.

Даниялик собиқ футболчининг фикрича, «шаҳарликлар» келгуси беш мавсумнинг ҳар бирида 25 очкодан маҳрум қилиниши лозим.

Шмейхель бу ҳақда «Манчестер Сити»нинг Англия Премьер-лигаси 6-турида «Ливерпуль» устидан 3:0 ҳисобида қозонган ғалабасидан сўнг Viaplay телеканали эфирида гапирди.

У клубни Премьер-лигадан четлатиш тарафдори эмаслигини, бироқ унга беш йиллик трансфер тақиқи ва катта миқдорда жарима қўлланиши зарурлигини таъкидлади.

«Бу бошқа барча клублар учун ҳам огоҳлантириш бўлиб қолиши керак. Премьер-лигада қоидаларни бузсангиз ва бошқа клубларга нисбатан ноҳалол йўл тутсангиз, бунинг оқибати жуда оғир бўлишини ҳамма билиши шарт.

Менимча, бу жуда муҳим: беш йиллик трансфер тақиқи ва катта миқдордаги жарима қўлланиши керак.

Шунингдек, клуб эгалари «Манчестер Сити»ни сотишга мажбур қилиниши лозим», — деди Шмейхель.

Собиқ дарвозабон молиявий қоидабузарликларга алоқадор шахслар ҳам футбол фаолиятидан четлатилиши кераклигини қўшимча қилди.

Унинг таъкидлашича, «Манчестер Сити»нинг амалдаги эгалари Англияда футбол клубини бошқаришга муносиб эмас.

«Манчестер Юнайтед»нинг яна бир собиқ футболчиси Яп Стам ҳам «шаҳарликлар»га нисбатан қаттиқ жазо қўлланишини қўллаб-қувватлади.

Нидерландиялик мутахассиснинг фикрича, «Манчестер Сити» молиявий қоидалар бузилган даврда қўлга киритган чемпионлик унвонларидан ҳам маҳрум этилиши керак. У бундай қарор бошқа клублар учун сабоқ бўлишини таъкидлади.

Шу билан бирга, «Манчестер Сити» ўзига нисбатан чиқарилган қарор устидан апелляция берган ва айбловларни рад этишда давом этмоқда.