Мадриднинг "Реал" клуби ярим ҳимоячиси Федерико Вальверде Испания чемпионати доирасида "Вильярреал"га қарши ўйинда (1:0) майдондан четлатилган жамоадоши Винисиус Жуниорнинг тўртта учрашувга дисквалификация қилинишига муносабат билдирди.
Уругвайлик футболчи бразилиялик ҳужумчига нисбатан қўлланилган жазони ҳаддан ташқари қаттиқ деб ҳисобламоқда.
"Винисиус тўртта ўйинга четлатилишга лойиқ эмас. У бу ҳаракатни атайлаб содир этмади", — дея Вальверденинг сўзларини келтиради инсайдер Фабрицио Романо.
Эслатиб ўтамиз, Винисиус "Вильярреал" футболчиларидан бирининг сочидан тортгани учун майдондан четлатилган эди. Дисквалификация туфайли бразилиялик юлдуз "Барселона"га қарши ўтадиган муҳим учрашувни ҳам ўтказиб юборади.
Винисиус жорий мавсумда Испания Ла Лигасининг саккизта баҳсида иштирок этиб, битта гол урди ва учта голли узатмани амалга оширди.
