Ла Лига президенти Хавьер Тебас Мадриднинг «Реал» клуби раҳбарияти уни зудлик билан лавозимидан кетишга чақирган расмий баёнотига жавоб қайтарди.
Эслатиб ўтамиз, навбатдаги можарога Тебаснинг яқинда билдирган фикрлари сабаб бўлди. Ла Лига раҳбари «Реал» клубининг расмий телеканали — Real Madrid TV таҳрир сиёсати ва фаолиятини нацистлар Германиясининг маориф вазири Йозеф Геббельснинг тарғибот усуллари билан омма олдида таққослаган эди. Бу эса Мадридда норозилик тўлқинини келтириб чиқарди.
«Сўнгги 13 йил давомида “Реал” раҳбарияти неча марта менинг истеъфомни талаб қилгани ёки обрўйимни тўкишга уринганини санашни ҳам унутиб қўйдим. Улар ҳар қандай воситадан фойдаланишди: Спорт бўйича олий кенгашга (CSD) тўғридан-тўғри ёки воситачилар орқали чексиз шикоятлар, шунингдек, жиноий даъволар. Мадридликларнинг бугунги баёноти ҳам ана шу занжирнинг навбатдаги бўғини, холос. Эътиборлиси, улар ҳанузгача энг муҳим саволларга жавоб беришмаяпти», — деб ёзди Тебас ижтимоий тармоқлардаги саҳифасида.
«Мадридда бетарафлик ва мустақиллик тушунчаларини чалкаштириб юборишмоқда. Менинг лавозимим мустақил бўлишни талаб қилади, аммо бу адолатсизликка нисбатан сусткашлик қилиш ёки “Реал” телеканали ва унинг тарафдорлари томонидан чемпионатимизга қарши уюштирилаётган узлуксиз, номутаносиб ва очиқдан-очиқ ҳақоратомуз ҳужумларга жим қараб туришим кераклигини англатмайди», — дея қўшимча қилди Ла Лига раҳбари.
Тебас, шунингдек, Ла Лига раҳбарияти шов-шувли «Негрейра иши» бўйича дастлабки кунларданоқ фаол ҳаракат қилгани ва Испанияда ҳакамлик тизимини ислоҳ қилиш борасида сезиларли натижаларга эришганини алоҳида таъкидлади.
«Бу вазиятдан чиқарадиган хулосам аниқ: улар миллий чемпионатни йўқ қилишга интилмоқда. Бу — улар Суперлига лойиҳаси орқали ҳозиргача амалга ошира олмаган ишларидир», — дея хулоса қилди Ла Лига президенти Хавьер Тебас.
