Чемпионлар лигаси умумий босқичининг 3-турида Мюнхеннинг "Бавария" клуби Лондоннинг "Арсенал" жамоасини қабул қилди. "Арена Мюнхен" стадионида кечган қизиқарли баҳс 2:2 ҳисобидаги дуранг билан якунланди.

Учрашувнинг 10-дақиқасида меҳмонлар жиддий йўқотишга учради. Жароҳат олган Букайо Сака ўйинни давом эттира олмади ва унинг ўрнига Эберечи Эзе майдонга тушди.

Айнан Эзе 25-дақиқада ҳисобни очиб, лондонликларни олдинга олиб чиқди. Бироқ 35-дақиқада Альфонсо Дэвис жавоб голини киритиб, мувозанатни тиклади.

Иккинчи бўлимнинг 61-дақиқасида "Бавария" ҳужумчиси Гарри Кейн пенальтидан унумли фойдаланиб, мезбонларни ҳисобда олдинга олиб чиқди.

Шунга қарамай, "Арсенал" мағлубиятдан қутулишга муваффақ бўлди. 82-дақиқада Деклан Райс рақиб дарвозасини ишғол қилиб, ҳисобни тенглаштирди — 2:2.

Чемпионлар лигасининг 4-турида "Бавария" 3 ноябрь куни Мадриднинг "Атлетико" клубига қарши майдонга тушади. "Арсенал" эса 4 ноябрда Праганинг "Славия" жамоаси билан куч синашади.

Чемпионлар лигаси. Умумий босқич, 3-тур

"Бавария" — "Арсенал" — 2:2

Голлар: Дэвис (35), Кейн (61, пенальти) — Эзе (25), Райс (82).