Туркиянинг «Галатасарой» клуби ярим ҳимоячиси Алексей Батраков Англия Премьер-лигасининг бир қатор етакчи жамоалари эътиборига тушди.

TEAMtalk нашрининг хабар беришича, 21 ёшли россиялик футболчининг хизматларига «Арсенал», «Ливерпуль», «Манчестер Сити», «Манчестер Юнайтед» ва «Челси» қизиқиш билдирмоқда.

Манба маълумотига кўра, «Арсенал» ва «Ливерпуль» вакиллари Чемпионлар лигасида «Галатасарой»нинг «Лилль»га қарши учрашувини бевосита кузатиб, Батраковнинг ҳаракатларини баҳолашган.

Туркия клубининг 4:2 ҳисобидаги ғалабаси билан якунланган мазкур баҳсда россиялик ярим ҳимоячи ҳам ўз номини таблога ёздириб қўйган.

Қайд этиш жоиз, Алексей Батраковнинг «Галатасарой» билан амалдаги шартномаси 2031 йил 30 июнга қадар мўлжалланган.

Айни пайтда футболчининг трансфер бозоридаги қиймати 28 миллион еврога баҳоланмоқда.