«Бавария» бошқарув кенгаши аъзоси Ули Хёнесс жамоа бош мураббийи Венсан Компани фаолиятидан жуда мамнун эканини билдириб, бельгиялик мутахассис билан шартномани янада узайтириш тарафдори эканини маълум қилди.

Хёнесснинг таъкидлашича, айни пайтда мюнхенликлар учун Компани энг муносиб мураббий ҳисобланади. У ҳатто амалдаги келишув муддати тугамасидан анча олдин янги шартнома имзолашга тайёрлигини айтди.

«Компани билан ишлаётганимиз биз учун катта омад. Ҳозирги вазиятда «Бавария» учун ундан яхшироқ мураббийни тасаввур қила олмайман.

Яқинда Венсаннинг ўзига ҳам у билан шартномани узайтиришимиз кераклигини айтдим. Ваҳоланки, унинг амалдаги келишуви 2029 йилнинг ўрталаригача мўлжалланган.

Агар у эртага бизга шартномани узайтириш таклифи билан мурожаат қилса, мен шахсан бу ишни ҳеч қандай иккиланишсиз, дарҳол амалга оширган бўлардим», — деди Хёнесс.

Қайд этиш жоиз, Хёнесснинг интервьюсидан парчалар Венсан Компани соғлиғи билан боғлиқ хавотирли хабарлар тарқалганидан кейин эълон қилинди.

Аввалроқ оммавий ахборот воситалари бельгиялик мутахассис машғулот вақтида ҳушидан кетиб, шифохонага ётқизилгани ҳақида хабар берган эди.

«Бавария» кейинчалик Компани машғулот пайтида ўзини ёмон ҳис қилганини ва тиббий кўрикдан ўтиш учун шифохонада шифокорлар назоратига олинганини тасдиқлади.