Ўзбекистон-Вьетнам ўйинидан кейинги матбуот анжуманида дастлаб меҳмонлар бош мураббийи Нгуен Ван Си иштирок этди.

— Ўзбекистон кучли жамоа, аммо буюк жамоа эмаслиги бугун кўринди. Улар бир вазиятда фейр-плей қоидасига амал қилишмади. Боз устига, футболчимиз дарвозабон билан бирга-бир вазиятга чиқиб бораётганида ҳакам Анзур Исмоиловга қизил карточка бериши керак эди. Бугун Ўзбекистон ғалаба қозонди, аммо ушбу натижа барча нарсани ҳал қилди дегани эмас.

— Вьетнам томонидан киритилган биринчи автоголни ҳакам ҳисобламай тўғри қилди, деб ўйлайсизми?
— Ўзбекистон терма жамоаси сардори Сервер Жепаров ҳимоячимизга нисбатан фол ишлатганди. Шунинг учун ҳакам голни ҳисобламай, тўғри қилди.

— Шогирдларингиз бугун кўплаб вазиятларда майдонда ётиб олиб, вақтни чўзишди. Бу махсус тактикамиди?
— Бу тактикага ҳам боғлиқ эди. Ўйин бошида футболчиларимиз йиқилган пайтда ҳакам уларга эътибор қаратмади. Ўзбекистон жисмонан кучли эканини билардик. Шу боис ўз кучимизни тенг тақсимлаган ҳолда ўйнашга ҳаракат қилдик.

— Ҳисоб ҳали 0:0 бўлиб турган пайтда иккинчи ҳужумчини майдонга туширдингиз. Бу ғалаба учун юришмиди?
— Ҳа, бу ғалаба учун ҳаракат эди. Дуранг ҳам бизни қаноатлантирарди, аммо ғалабани ҳам ёдимизда ушлаб тургандик. Лекин бугун ҳам ютқазиб қўйдик. Кеийнги ўйинларда очко жамғаришга ҳаракат қиламиз.

— Роппа-роса бир ойдан Вьетнамда жавоб ўйини бўлади. Навбатдаги ўйин бугунгисидан нимаси билан фарқ қилиши мумкин?
— Вьетнамда 3 очко қўлга киритишга ҳаракат қиламиз. Ўзбекистон кучли жамоа, аммо биз ўз уйимизда ғалаба қозонишга ҳаракат қиламиз. Жавоб ўйинида яхши ўзгаришларни амалга оширамиз.