ФИФА терма жамоаларнинг навбатдаги рейтинг жадвалини эълон қилди. Кеча тахмин қилганимиздек, Ўзбекистон терма жамоаси янги рейтингда Осиёнинг учинчи жамоасига айланди. Терма жамоамиз 2 поғона юқорига кўтарилиб, 55-ўринни банд этди.

Терма жамоамизнинг рейтинг баллари 3тага ошди ва эндиликда 582 очкога эга бўлиб турибмиз. Биздан кейинги ўринларни эса Жанубий Корея (569) ва Австралия (564) эгаллаб туришибди. Япония эса 2 поғона пастга тушиб, 44-ўринга жойлашган бўлса, Эрон бир ўрин пастлаган (49).

Осиё кубоги-2015 саралаш босқичида навбатдаги ғалабага эришган БАА терма жамоаси эса бирданига 11та ўрин кўтарилган (71-ўрин). 70-ўрин эса ЖЧ-2014 плей-офф босқичида юришини давом эттираётган Иорданияга тегишли (3 поғона кўтарилиш). Гонконг 148-қатордан силжимаган бўлса, Вьетнам 2та ўрин сакраб, 151-ўринга жойлашди.

МДҲ миқёсида эса Ўзбекистон 4-ўринни эгаллаб турибди. Дастлабки икки ўринни Россия (19) ва Украина (20) эгаллаб турган бўлса, Арманистон бирданига 17 поғона кўтарилиб, 38-ўринга чиқиб олди.

Рейтинг жадвалини эса Испания бошқаришда давом этмоқда. Аргентина ва Германия терма жамоалари ўзаро ўрин алмашишди ва энди немислар 2-ўринда боришмоқда. Италиянинг 4 поғона "шўнғиши" оқибатида Колумбия, Бельгия ва Уругвай терма жамоалари бир ўриндан кўтарилишган.

Рейтинг жадвалининг тўлиқ кўриниши билан ФИФА сайтида танишиб олишингиз мумкин.