Махачқалъанинг "Анжи" клуби Европа лигаси доирасида Норвегиянинг "Тромсе" клубини мағлубиятга учратди. Бу доғистонликларнинг нафақат Европа лигасидаги илк ғалабаси, балки мавсумдаги дастлабки ғалабаси бўлди.

Одил Аҳмедов "Анжи"нинг асосий таркибида майдонга тушди ва бутун ўйин давомида ўта фаол ҳаракат қилди. Ҳаттоки у ғалабанинг асосий сабабчиларидан бири бўлди.

Ўйиннинг 18-дақиқасида ҳамюртимиз қийин вазиятда тўпни жарима майдончасига яқинига етказа олди. Тўпга биринчи бўлиб етиб келган Бурмистров дарвозабон билан бирга-бир вазиятда дарвозани ишғол қила олди.

Учрашувнинг 26-дақиқасида махачқалъаликлар жарима зарбасини амалга оширишди. Одил Аҳмедовнинг зарбаси рақиб футболчи Фоютнинг оёғи тегиб, дарвозага кириб бораётганида "Тромсе" дарвозабони дарвоза тўсини остидан тўпни майдон ташқарисига чиқариб юборди. 66-дақиқада Одил берган айланма зарба эса дарвоза тўсини ва устуни кесишган бурчакка яқин жойдан ўтиб кетди.

Ўйин тугашига 8 дақиқа қолганида эса Аҳмедов яна бир хавфли вазиятни юзага келтирди. У ўнг қанотда тўпни қабул қилиб олди ва чапроққа ўтиб, дарвоза томон кучли зарба берди. Тўп шундоққина дарвоза устуни ёнидан ўтиб кетди.

Ушбу ғалабадан кейин "Анжи" 4 очко билан гуруҳда 2-ўринга кўтарилиб олди.