29 октябрь куни "Пахтакор" Фарғонада "Нефтчи" меҳмони бўлади. Бу жамоалар олий лига ташкил этилганидан буён унда узлуксиз қатнашиб келаётган 3 жамоадан 2таси ҳисобланади. Улар ўртасидаги ҳар бир беллашув ўта ҳужумкор ва кескин тарзда ўтади. Шу сабабли "Пахтакор" ва "Нефтчи" қарама-қаршилиги ўзбек "классикоси" мақомига лойиқ кўрилган. Умид қиламизки, сешанба куни ҳам жамоалар мухлисларга чиройли футбол тақдим этишади.

Жамоалар таркибида дисквалификация туфайли мажбурий йўқотишлар мавжуд эмас. Амет Мемет аввалги турда "Локомотив"га қарши кечган баҳсда Насибуллаев, Эрматов, Саидов каби етакчиларга дам берди. Биринчи даврада Даврон Ҳошимов киритган ягона тўп "Пахтакор"га ғалаба келтирганди.

Жамоалар олий лига тарихида ўзаро 43 бор майдонга тушган. 19 баҳсда "шерлар", 17 беллашувда "Нефтчи" зафар қучган. 7 ўйинда дуранг кузатилган. "Пахтакор" 70, фарғоналиклар 59 тўп киритган. Охирги уч мавсумда Фарғонадаги учрашувларда мезбонлар мағлубиятга учрашмаган. Ўтган мавсумда 3:1 ҳисоби қайд этилганди.

Навбатдаги ўйин илк бор Қиргулидаги стадионда ўтказилади. Ёшлар таркиблари 28 октябрь куни Қувасойда соат 15:00да ўйинларини бошлашса, асосий таркиблар 29 октябрь, сешанба куни соат 15:00да Қиргулидаги стадионда ўйинни бошлашади. Биз эса жамоалардан чиройли футбол кутиб қоламиз.

«НЕФТЧИ» – «ПАХТАКОР»
Ҳакамлар: Олим Толибжонов (Тошкент), Равиль Шояхметов (Тошкент), Тимур Гайнулин (Тошкент), Вадим Агишев (Тошкент).
Назоратчи: Алишер Абдуллаев (Тошкент).