Қозоғистоннинг «Актобе» жамоаси ўта мураккаб ва драматик кечган баҳсда дуранг натижани қайд этди ва мамлакат чемпионлигини қўлга киритди.

Актобеликлар сўнгги турда ўз майдонида кучли олтиликнинг энг сўнгги поғонасида бораётган "Ордабаси"ни қабул қилди. Ушбу баҳсда Никитенко шогирдларини дуранг натижа ҳам чемпионга айлантирарди.

Ўйиннинг 33-дақиқасида чимкентликлар бурчак тўпини голга айлантиришди. Шундан кейин мезбонлар ҳисобни тенглаштиришга уринсаларда, уларнинг ўйини чиқавермади. Боз устига, голдан кўп вақт ўтмасдан Бикмаев жароҳат олиб, майдонни тарк этди. Иккинчи бўлимнинг 61-дақиқасида Гейнрих қулай масофадан дарвозани ишғол қила олмади. Кўп ўтмасдан Саша сариқ карточка ҳам ишлади. Шунингдек, Темур Кападзе ҳам "сариқ"дан бенасиб қолмади. Ўйин тугашига 7 дақиқа қолганида эса «Актобе» узоқ кутилган голни уришга муваффақ бўлди — бурчак тўпи орқали.

Аммо, лекин, бироқ, орадан 2 дақиқа ўтиб "Ордабаси" яна ҳисобда олдинга чиқиб олди. Параллел кечаётган баҳсда эса "Астана" сафарда "Шахтёр" устидан 4:1 ҳисобида ғалаба қозонаётганди. Бу эса чемпионни аниқлаш учун "олтин" учрашув ташкил этилишидан дарак берарди. Актобедаги ўйиннинг асосий вақтига ҳакам 3 дақиқа қўшиб берди ва унинг иккинчиси ўтиб бораётганида Абат Аймбетов узоқ масофадан дарвозани ишғол қилиб, «Актобе»га чемпионликни тақдим этди!

Гейнрих 90+3-дақиқада ўз ўрнини бошқа жамоадошига бўшатиб берди.

Шу тариқа «Актобе» асосий рақиби "Астана"дан 1 очко кўп жамғарди ва бешинчи марта Қозоғистон чемпионлигини қўлга киритди. Учинчи ўрин эса "Қайрат"га насиб этди.

Темур Кападзе, Александр Гейнрих ва Марат Бикмаевни Қозоғистон чемпионатининг олтин медаллари билан табриклаймиз!