Дортмунднинг «Боруссия» жамоаси ҳужумчи Роберт Левандовскини январда бошланадиган қишки трансфер вақтида сотишга тайёр. Бу ҳақда El Mundo Deportivo хабар бермоқда.
Манбада айтилишича, футболчини сотиб олмоқчи бўлган жамоа атиги 8,6 миллион евро тўласа бўлгани. Айни вақтда футболчига «Барселона», «Реал», «Челси», «Арсенал», «Бавария» ва «МЮ» қизиқиш билдирмоқда.
Хабарингиз бор, футболчининг шартномаси келаси йилнинг ёзида ўз ниҳоясига етади ва у эркин агент сифатида хоҳлаган жамоасига ўтиб кетиши мумкин. Шунинг учун «Боруссия Д» Польша терма жамоаси ҳужумчисини арзон бўлса ҳам қишда сотмоқчи. Акс ҳолда ёзда Роберт бошқа жамоага кўчиб ўтса, клуб бундан фойда кўрмайди.
Жорий мавсумда Левандовски «Боруссия Д» таркибида 14 учрашувда майдонга тушган ва 12 марта гол муаллифига айланиб улгурган.
