Спорт гимнастикаси бўйича Ўзбекистон терма жамоаси аъзоси Оксана Чусовитина Мексикада бўлиб ўтган спорт гимнастикаси бўйича Очиқ чемпионатда совриндорлар қаторидан ўрин олди.
Ўзбекистон Гимнастика федерацияси матбуот хизматининг Kun’га маълум қилишича, Чусовитина япониялик гимнаст Кожи Уематсу билан жуфтликда олтин медални қўлга киритган бўлса, кўпкураш баҳсларида бронза медаль эгасига айланди.
«Оксана қайд этган натижалардан, унга берилган юқори баҳолардан қониқиш ҳосил қилдим, биз Оксана учун хурсандмиз. Унинг ўзи-да мусобақадаги иштирокидан яхши таассурот олди», – дейди Ўзбекистон гимнастика федерацияси катта мураббийи Людмила Ли.
Мусобақалар 1-2 декабрь кунлари Мексиканинг Акапулько шаҳрида бўлиб ўтган. Мусобақада жами 11 мамлакат спортчилари иштирок этишган. Жорий мусобақада илк бор қуръа натижасида аниқланган аралаш жуфтликлар (эркак ва аёл) ғолиблик учун кураш олиб борди.
Маълумот учун, Оксана Чусовитина хизмат кўрсатган спорт устаси, Олимпиада чемпиони, олти Олимпия ўйинлари иштирокчиси ҳисобланади.
