ФИФА ижроия қўмитаси 2016 ва 2017 йилларда ўтказиладиган жаҳон чемпионати мусобақалари ва ташкилот конгрессларига мезбонлик қиладиган давлат ва шаҳарлар номини эълон қилди.
Ўсмирлар (U-17) қизлар ўртасидаги 2016 йилги жаҳон чемпионати баҳсларига Иордания мезбонлик қилса, 20 ёшгача бўлган (U-20) қизлар ўртасидаги 2016 йилги жаҳон чемпионати баҳслари Жанубий Африка республикасига ишониб топширилди.
ФИФАнинг 2016 йилги Конгрессига Мексика пойтахти Мехико, 2017 йилги Конгрессига эса Малайзия пойтахти, айни вақтда, Осиё Футбол Конфедерацияси бош қароргоҳи жойлашган Куала-Лумпур шаҳри мезбонлик қилади. Ёшлар ўртасидаги (U-20) 2017 йилги жаҳон чемпионати эса Жанубий Кореяда ўтказилади.
ФИФА ижроия қўмитаси 5 декабрь куни ўсмирлар (U-17) ўртасидаги 2017 йилги жаҳон чемпионатига мезбонлик қилувчи мамлакат номини ҳам эълон қилди. Бош футбол ташкилоти аввал тахмин қилинганидек Озарбайжон эмас, Ҳиндистон фойдасига қарор чиқарган. Маълумот учун, ушбу мусобақа мезбонлиги учун Ўзбекистон ҳам даъвогарлик қилаётган эди.
Қайд этиш керак, ўсмир қизлар ўртасидаги 2014 йилги жаҳон чемпионати Коста-Рикада, 20 ёшгача бўлган қизлар ўртасидаги 2014 йилги жаҳон чемпионати баҳслари Канадада ўтказилса, ўсмирлар ўртасидаги 2015 йилги жаҳон чемпионати баҳсларига Чили, ёшлар ўртасидаги 2015 йилги жаҳон чемпионатига Янги Зеландия мезбонлик қилади.
