Шу кунларда Малайзия пойтахти Куала Лумпур Осиё футболининг етакчи клублари вакилларини ўз бағрига чорламоқда.
Келаётган сешанба ва чоршанба кунлари 2014 йилги Осиё Чемпионлар лигасида иштирок этадиган клублар вакиллари мусобақа олдидан ўтказиладиган махсус семинарда иштирок этадилар. Шунингдек, 10 декабрь куни қитъамизнинг клублар ўртасидаги энг нуфузли мусобақасининг гуруҳ босқичига қуръа ташлаш маросими бўлиб ўтади.
ОФКнинг ушбу семинарида иштирок этиш учун “Бунёдкор” ФК вакиллари Исломжон Ходжаев (жамоа менежери) ва Баҳодир Мирзаев (матбуот котиби) Тошкент-Куала Лумпур йўналиши бўйича парвоз қилишиб, семинар ўтказиладиган улкан отель – “BERJAYA TIMES SQUARE” меҳмонхонасига етиб келишди. Шунингдек, турнирни плей-офф босқичидан бошлайдиган мамлакатимизнинг икки клуби – “Локомотив” ва “Насаф” клуби вакиллари ҳам ҳозирда Куала-Лумпурда бўлиб туришибди.
