2013 йилда Ўзбекистон чемпионати ва кубок мусобақаларида ғалаба қозонган Тошкентнинг “Бунёдкор” жамоаси 2014 йилги мавсумга тайёргарликни 15 декабрдан бошлайди. Бу ҳақда клуб расмий сайтида маълумот тарқатилди. “14 декабрь куни футболчилар клуб қароргоҳида йиғилишади ва шифокорлар кўригидан ўтишади. Эртасидан эса янги мавсум учун тузилган режа асосида машғулотларга киришилади”, - дейилади fcbunyodkor.com хабарида.

Таъкидлаш лозимки, Миржалол Қосимов кўтаринки мавсумдан сўнг жамоа таркибида жиддий ўзгаришлар қилмоқда. Ярим ҳимоячилар Жасур Ҳасанов, Лутфулло Тўраев, ҳимоячи Анвар Ғофуровлар “Локомотив” клуби сафидан жой эгаллашди. Уларнинг ўрнини тўлдириш мақсадида клуб қатор футболчилар билан музокаралар ўтказмоқда.

Жумладан, ўтган мавсум тўпурари, украиналик Александр Пишур келгуси йил ҳам клуб сафида қолишга рози бўлди. Унинг ёнига эса “бўйи-бўйига мос” футболчи – Воҳид Шодиев қўшилган. Шодиев ўтган чемпионатда “Бухоро” сафида 12 бор рақиблар дарвозасини ишғол қилди. Миллий терма сафидаги икки учрашувида Вьетнам ва Гонгконг дарвозаларини биттадан ишғол қилди.

Шунингдек, яқин кунларда яна қатор иқтидорли футболчиларни “қалдирғочлар” сафида кўришимиз мумкин.