Аввал хабар қилганимиздек, 10 декабрь куни Малайзия пойтахти Куала Лумпур шаҳрида қитъа турнирларида иштирок этувчи жамоалар вакиллари иштирокида ОФК томонидан анъанавий тарзда ташкил этиладиган ўқув-семинари бошланди.

Унда "Насаф" жамоаси спорт директори Виталий Ни, клуб маркетинг бўлими раҳбари Заҳро Каримова, матбуот котиб Азизжон Нуров ва халқаро бўлим мутахассиси Юнус Набиев иштирок этишмоқда.

Семинарнинг илк куни ОФК мутахассислари ОЧЛнинг ўтган йилги якунлари ва янги мавсумда клублар олдига қўйиладиган талаблар, мусобақа регламенти ва бошқа кўплаб қизиқарли масалалар бўйича тушунтириш беришди.

Тушдан кейин ОФК штаб-квартирасида ОФК кубоги ва Осиё чемпионлар лигасига қуръа ташлаш маросими ўтказилди. Хабарингиз бор, “Насаф” ОЧЛ-2014 беллашувларини плей-офф беллашувлари орқали бошлайди. Унга кўра жамоамизнинг илк рақиби рақиби Қатарнинг “Ал-Жайиш” жамоаси бўлиши ойдинлашди. Қатардаги учрашув 8 февраль куни ўтказилиши белгиланган. Жамоамиз ушбу босқичдан муваффақиятли ўтса, плей-оффнинг учинчи босқичида БАА, Оман ёки Қувайт жамоаларидан бири билан тўқнаш келади. Бу босқич ҳам сафарда ўтади ва битта ўйиндан иборат бўлади. Ушбу босқичларда ғалабага эришсак, мусобақани гуруҳ босқичида давом эттиришимиз мумкин бўлади.

Қуръага кўра, агар жамоамиз гуруҳ босқичига йўл оладиган бўлса, унда биз “А” гуруҳидан жой оламиз. Бу гуруҳдан Эроннинг “Истиқлол”, Бирлашган Араб Амирликларининг “Ал Жазира”,  Қатарнинг “Ар-Райан” ва Саудия Арабистониннинг “Аш Шабоб” жамоалари ўрин олишган. Агар “Насаф” гуруҳ босқичида йўл оладиган бўлса, Қатар жамоаси “Бунёдкор” жой олган “В” гуруҳига йўл олади.

Семинарнинг биринчи куни якунида семинар иштирокчилари учун ОФК томонидан расмий зиёфат ташкил этилди.