«Барселона Б» жамоаси ҳужумчиси Антонио Санабария Римнинг «Рома» жамоасига ўтишга розилик билдирди.

Internationаl Business Times нашрининг хабар беришича, «Рома» 17 ёшли футболчи учун 2,5 миллион фунт тўлайди. Манбада айтилишича, Санабария «Барселона»дан кетишини ҳафта якунида эълон қилади.

Футболчи қишки трансфер вақтида «Рома»га ўтади, лекин трансфер келгуси йил ёзда расмийлаштирилади. Чунки «Рома» аллақачон иккита фуқаролик паспорти бўлмаган футболчини ўз таркибига қўшиб олган. Бир йил давомида бундан кўпига рухсат берилмайди.

Аввалроқ Санабарияни «Арсенал» ўз таркибига қўшиб олмоқчи эди, бироқ Британияда ишлаш учун рухсатнома олишда муаммо юзага келгани учун трансфер амалга ошмай қолганди. Таъкидлаш жоизки, ёш бўлишига қарамай Санабария Парагвай терма жамоаси таркибида иккита ўйинда майдонга тушишга улгурган.