Ўзбекистоннинг биринчи рақамли ракетка устаси Денис Истомин Австралиянинг Сидней шаҳрида ўтказилаётган “Apia International Sydney” халқаро теннис турнирини ғалаба билан бошлади.

Мукофот жамғармаси 452.670 АҚШ долларини ташкил қилган мазкур халқаро турнирда ҳамюртимиз яккалик баҳсларининг дастлабки учрашувини испаниялик Пабло Андухарга қарши ўтказиб, 6-1, 6-2 ҳисобида зафар қучди.

Денис Истомин нимчорак финалда хорватиялик Марин Чилич (Хорватия) билан баҳс юритади. Мазкур халқаро турнирда еттинчи рақам остида сараланган хорватиялик теннисчи баҳсларга иккинчи босқичдан киришади.

Эслатиб ўтамиз, Денис Истомин яқинда Брисбен (Австралия)да ўтказилган халқаро турнирнинг биринчи босқичида Марин Чилич билан куч синашиб 7-6, 6-7, 4-6 ҳисобида имкониятни бой берган эди.

Халқаро турнир 11-январга қадар давом этади.