Кутилганидек, "Барселона" ҳам Испания кубоги финалига чиқди. "Реал Сосьедад" эса ўз майдонида каталонияликлар билан дуранг ўйнашнинг уддасидан чиққани сан-себастьянлик мухлисларни хушнуд этди.

Ўйинда Мартино шогирдлари катта устунликка эришдилар. Учрашувнинг 27-дақиқасида Месси майдон марказидан тўп билан рақиб жарима майдончаси яқинигача борди ва 4 нафар ҳимоячи орасидан шундай зарба бердики, дарвозабон ҳам бу зарба қаршисида ожиз қолди.

Иккинчи бўлимда каталонияликларда жуда кўплаб имкониятлар бўлди. Аммо мезбонлар дарвозабони Субикарай қаҳрамонлик кўрсатиб, ўз дарвозасидан бошқа тўп ўтказиб юбормади.

Мезбонлар ҳам имкон қадар ҳааркат қилишди. Бир вазиятда Карлос Веланинг зарбаси дарвоза устунига тегиб қайтган бўлса, ўйин тугишига 3 дақиқа қолганда "Реал Сосьедад" ҳисобни тенглаштирди. Тезкор ҳужум натижасида жарима майдончасига кириб келган Гризманга тўпни тўхтатиб ўтирмай, Пинтонинг яқин бурчагини нишонга олди.

Биринчи ўйиндаги 2:0 ҳисобидаги ғалаба "Барселона"ни Испания кубоги финалига олиб чиқди.

Кубок финали ўтадиган стадион ва муддатни Испания футбол лигаси мутасаддилари белгилашади. Дунё футбол мухлислари эса яна бир "Эл-классико"дан баҳраманд бўлишади.

Испания кубоги, ярим финал, жавоб ўйини
"Реал Сосьедад" – "Барселона" 1:1 (0:1)
Голлар: 0:1 – 27 Месси, 1:1 – 87 Гризманн.
Реал Сосьедад – Субикараи, Гастаньяга (Элустондо, 67), Хосе Анхель, Ансотеги, Сальдуа, М.Гонсалес, Сурутуса, Хаби Прието (Каналес, 82), Гризманн, Вела, Сеферович (Кастро, 61).
Барселона – Хосе Пинто, Альба, Маскерано, Пике, Дани Алвес, Бускетс (Бартра, 90), Фабрегас, Педро (Санчес, 77), Хави (А.Сонг, 66), Иньеста, Месси.
Огоҳлантиришлар: Бускетс (26), Вела (31), Гастаньяга (52), Сурутуса (56), Фабрегас (89).