Ўзбекистон Футбол Федерацияси президенти Мираброр Усмонов ЎФФ Терма жамоалар марказининг айрим мутасаддиларини ОАВдаги «мантиқсиз интервьюлар» учун танқид остига олди. Бу ҳақда ЎФФ раҳбари Мураббийлар кенгашининг 18 февраль куни бўлиб ўтган мажлисида фикр билдирди, дея хабар бермоқда ЎФФ матбуот хизмати.

Мираброр Усмоновнинг қайд этишича, Уммонда бўлиб ўтган U-22 Осиё чемпионатидан сўнг, Терма жамоалар маркази мутасаддиларининг ОАВга берган интервьюларини кузатган.

«Нима эмиш, мусобақа январда ўтказилганлиги сабабли терма жамоамиз Уммондаги мусобақада мағлубиятга учрабди. Энди айтингчи, Сиз турнирнинг январда ўтказилишини кеча билдингизми? Январдалигини била туриб, нега етарлича тайёргарлик кўрмадингиз? Эртага Осиё Кубоги январда ўтказилса, яна нималар дейсизлар?», – деди ЎФФ президенти.

Эслатиб ўтамиз, 2014 йилнинг январь ойида Уммонда бўлиб ўтган U-22 Осиё чемпионатида Ўзбекистон терма жамоаси муваффақиятсиз иштирок этганди. Мусобақадан сўнг «Интерфутбол» газетасига интервью берган терма жамоа техник директори Рустам Акрамов январь ойида мусобақа ўтказиб бўлмаслиги, бу ҳақда ОФК вакилларига айтгани ва уларга мусобақаларни апрель ойида ташкил этишни маслаҳат берганини айтиб ўтганди.

«Биз ОФКга бундай нуфуздаги мусобақаларни январь ойида ўтказмаслик бўйича расмий мурожаат билан чиқмоқчимиз», – деганди Рустам Акрамов.

Маълумот учун, Рустам Акрамов футбол профессори мақомига эга. У ўз вақтида ФИФА ва ОФКда фаолият олиб борган, Ўзбекистон миллий терма жамоаси бош мураббийи сифатида 1994 йилги Осиё Ўйинларида ғолиб чиққан.

Қайд этиш жоиз, 18 февраль куни бўлиб ўтган Мураббийлар кенгаши мажлиси давоми Мираброр Усмонов ТЖМ фаолиятидан норози эканлигини очиқ маълум қилган. Шунингдек, терма жамоа мураббийларига «шаклланган, кап-катта одам» ҳисобланган футболчиларга дўқ-пўписа ва сўкиб кўрсатма бериб бўлмаслигини айтган.