"Бунёдкор" ярим ҳимоячиси Дилшод Жўраевнинг жамоасининг Осиё чемпионлар лигаси баҳсларига тайёргарлигини ҳар доимгидан ҳам яхшироқ деб ҳисоблайди. Бу ҳақда у ОФК расмий сайти учун берган интервьюсида гапириб ўтди.

Ўзбекистон чемпиони ОЧЛнинг ўтган йилги мавсумида нимчорак финалда Таиланднинг "Бурирам Юнайтед" жамоаси тўсиғидан ўта олмаганди. Улар мазкур мавсумни Саудия Арабистонининг "Ал-Фотиҳ" жамоаси билан сафарда бошлашади.

Миржалол Қосимов шогирдлари мавсумга таййёгарликни БАА ва Туркияда олиб боришди. Йиғинлар давомида "Спартак" (Москва), "Шахтёр" (Донецк) каби кучли жамоалар билан назорат ўйинлари ўтказилди.

"Ўтган йилги ўйинлар бизни янада кучлироқ бўлишга ундади ва 2014 йилги мавсумга янада яхшироқ тайёргарлик кўрдик", дейди 22 ёшли Жўраев. "Бурирам"га қарши ўйиндаги мағлубият бизга кўп нарса берди. Ўша ўйинларда бизда гол уриш учун кўп имкониятлар бўлди, аммо улардан фойдалана олмадик. Ушбу мавсумда бундай хатони такрорламасликка ҳаракат қиламиз".

"Осиё чемпионлар лигаси мусобақаси "Бунёдкор" учун муҳим аҳамиятга эга. Ушбу мавсумда биз бош совринни қўлга киритишни истаймиз. ОЧЛ соврини ушбу мавсумдаги бизнинг бош мақсадимиз бўлади", дейди "Бунёдкор" футболчиси.

Тошкентнинг "Бунёдкор" икки марта (2008, 2012) ОЧЛ ярим финалигача етиб борган. Ўшанда "қалдирғочлар" Австралиянинг "Аделаида Юнайтед" ва Кореянинг "Ульсан" жамоларига имкониятни бой берган. Бу сафар эса Қосимов жамоаси 2 йиллик танаффусдан кейин Ғарб минтақасига қайтди. Уларнинг бу галги юриши Саудиянинг Ал-Ҳаса шаҳридаги Абдуллоҳ бин Жалавий стадионидаги ўйин билан бошланади. "Ал-Фотиҳ" ОЧЛ дебютанти ҳисобланади. Шунингдек, "В" гуруҳида Қатарнинг "Ал-Жайиш" ва Эроннинг "Фулад" жамоалари ўрин олишган.

"Шарқ минтақаси жамоалари анча кучли, айниқса япон клублари. Шу боис Ғарбда иштирок этиш биз учун қизиқарли бўлади. Бу яна бир ўзига хос тажриба бўлади", дейди Ўзбекистон ёшлар (U22) терма жамоаси билан Уммонда ўтказилган қитъа чемпионатида иштирок этган футболчи.

"Саудия Арабистони жамоалари ҳамиша кучли бўлиб келишган. Уларнинг таркибида яхши савиядаги легионерлар бор. Саудия иқлими биз учун ноқулай ҳисобланади. Шунинг учун сафар баҳси бирмунча қийин ўтиши мумкин. Шунингдек, Эрон клуби ва Эрон чемпионати кучли эканини яхши биламиз".

"Шунга қарамай, Чемпионлар лигаси баҳсига ким яхшироқ тайёр бўлса, ким кучли бўлса, ўша ғалаба қозонишини таъкидлаб ўтмоқчиман. Таркибда кучли ўйинчилар борлиги катта аҳамиятга эга эмас, ҳаммаси тайёргарликка боғлиқ", дейди Дилшод Жўраев.