Олий лига баҳслари бошланишига ҳам тобора оз қолмоқда. Биласиз, 1-тур баҳслари 15 март куни старт олади. Шу куни “Машъал” Жиззахда “Сўғдиёна” меҳмони бўлади. Кейин эса жамоамиз 23 мартда “Бунёдкор”ни қабул қилади. Демак, Муборакдаги очилиш учрашуви ўзига яраша байрам каби ўтишига шубҳа йўқ.

Муборакдаги марказий Баҳром Вафоев номидаги стадионда катта таъмирлаш ишлари кетаётгани ҳақида хабар бергандик. Ҳозир ҳам қурилиш ишлари қизғин давом этмоқда. Баҳром Вафоев номли стадионда таъмирлаш ишлари тезроқ якунига етиб, стадион мавсумга шай ҳолатга келиши учун маҳаллий аҳоли ҳам қўлдан келганча ёрдам бериб келяпти. Бундан ташқари, “Машъал” – “Нефтчилар ва газчилар” жамоаси эмасми, Муборакнефтегаз унитар шуъба корхонаси ҳам бор кўмакни ишга соляпти.

Муборакда аксарият халқ байрамлари айнан шу стадионда нишонланади. Масалан, “Наврўз”, “Мустақиллик” байрами ва ҳоказо. Бундан ташқари, “Камолот” ёшлар ижтимоий ҳаракати томонидан ташкил этиладиган турли тадбирлар ҳам шу ерда ўтказилади. Бундан кўриниб ттурибдики, стадионнинг замонавий ва кўркам ҳолатга келиши нафақат “Машъал” футбол клуби вакилларини, балки бутун Муборак халқини хурсанд қилади. Ўйлаймизки, таъмирлаш ишлари ниҳоясига етганидан сўнг стадионимиз ажойиб кўринишга эга бўлади.