Иорданияда қиличбозлик бўйича кадетлар ўртасида ўтказилаётган Осиё чемпионатида Ўзбекистон терма жамоаси аъзолари шпага бўйича бўлиб ўтган мусобақаларда кумуш медал совриндори бўлдилар.

Саралаш мусобақаларида кетма-кет ғалабага эришган ҳамюртларимиз, ярим финал баҳсида Япония терма жамоасидан 45:43 ҳисобида устун келдилар. Шу ўринда таъкидлаш жоизки, Александр Равнягин бошчилигидаги кадетларимиз финалга қадар кечган баҳсларда муваффақиятга эришиб, Ўзбекистон қиличбозлик мактаби қай даражада тараққий этиб бораётганлигини амалда яна бир бора исботладилар. 

Мазкур Осиё чемпионатига қизғин хозирлик кўрган ҳамюртларимизни ҳал қилувчи финал мусобақасида Осиё рейтинг жадвалида пешқадамлик қилаётган Хитой терма жамоасигина тўхтатиб қолишга куч топа олди.

Шу тариқа ёш шпагачиларимиз биринчи маротаба Осиё чемпионатида кумуш медал совриндори бўлдилар. Терма жамоамиз муваффақиятига Жавоҳирбек Нурматов, Абдулвосит Насирдинов, Жўрабек Жалилов ва Файзулла Алимовлар муносиб ҳисса қўшдилар.

Қиличбозлик бўйича Осиё чемпионати баҳслари давом этмоқда. Терма жамоамиз устозлари энди рапира бўйича ўтказиладиган мусобақаларда ҳам шогирдларидан юқори натижаларни қўлга киритишларига умид қилишмоқда.

“Мазкур Осиё чемпионати жорий йилнинг 3-12 апрель кунлари Болгариянинг Пловдив шаҳрида кадетлар ва ўсмирлар ўртасида ўтказиладиган жаҳон чемпионати олдидан терма жамоамиз аъзолари учун ўзига хос тайёргарлик босқичи вазифасини ҳам ўтамоқда – дейди Ўзбекистон қиличбозлик федерацияси бош котиби Нодира Алимова. Маълумки, ушбу жаҳон чемпионатида дунёнинг энг кучли спортчилари аниқланиши билан бирга, шу йилнинг 16-28 август кунлари Хитойнинг Нанкин шаҳрида ўтказиладиган II ўсмирлар Олимпиада ўйинларининг лицензиялари ҳам ўйналади. Ёш спортчиларимиз Осиё чемпионатидан қайтишгач, қарийиб 10 кун давомида пойтахтимиздаги қиличбозликка ихтисослаштирилган марказда тайёргарлик машғулотларини ўтказишади ва шундан сўнг Болгарияда ўтказиладиган жаҳон чемпионатига йўл оладилар”.