Хабарингиз бор, Жанубий Корея Кей-лигаси 4-турида ҳамюртимиз Сервер Жепаров тўп сурадиган “Сеонгнам” клуби ўз майдонида “Сувон”ни қабул қилди ва 2:0 ҳисобида ғалабага эришди.

Ушбу ўйин атрофидаги маълумотларни кенгроқ ўрганган "Footbalist" нашри айрим эътиборга молик воқеаларни ҳикоя қилади. Нашрнинг ёзишича, Сеонгнам бош мураббийи 76 ёшли Парк Жонг Хван Жанубий Корея футболининг отахон мураббийларидан ҳисобланади. У 1980-90 йилларда Жанубий Корея терма жамоасида ҳам фаолият юритган. Унинг машғулот ўтказиш услубини қаттиққўллигига ишора қилиб, "Спарта" услуби дейдиганлар ҳам бор.

26 март куни Сувон билан ўйиндан аввал матбуот анжуманида Парк Жонг Хван шундай деган: "Ҳаммангиз шогирдларимга нималарни уқтирганимга қизиқаяпсизлар. Шунчаки ҳотиржам ўйнанглар деб айтдим".

Шунингдек, бош мураббий сўнгги пайтларда нафақат ОАВ, балки футбол соҳаси мутахассисларини ҳам қизиқтириб келаётган Сервер Жепаров масаласига ҳам тўхталиб ўтган:

"Менинг Жепаров футболчи эмас, деган сўзларимни нотўғри талқин этибсизлар. Бу тушунмовчилик. Футболчи эмас деб ўйлаганимда уни жамоада ушлаб ўтирармидим? Бугунги ўйин захирасига киритармидим? Шунчаки қимматбаҳо футболчилиги туфайли нархига мос тушмайдиган ўйин кўрсатаётганлигини танқид қилгандим, холос".

Отабек Йўлдошев
Жанубий Корея, Сеул