Матбуот анжуманининг иккинчи қисмида андижонликлар бош мураббийи Азамат Абдураимов қатнашиб журналистларнинг саволларига жавоб берди.

«Ўйин тенг курашлар остида ўтди. Албатта, бугунги натижадан қониқиш ҳосил қилганим йўқ. Чунки ўз майдонингда ютқазиш аламлидир. Бунинг устига кетма-кет учинчи учрашувда ҳам ютқаздик. Бугунги ўйинни кўриб чиқиб хатоларимизни таҳлил қиламиз. Айни пайтда бизга гол етишмаяпти. Негадир ҳужумчиларимиз имкониятлардан фойдалана олмаяптилар. Футболчиларга қанотлардан ҳужумлар ташкил этиб, рақибга нисбатан босим уюштириш кераклигини уқтиргандим. Лекин улар кўрсатмаларимни бажара олишмади. Бугун ўз ўйинимизни намойиш эта олмадик. Бунга майдоннинг ҳолати ҳам комбинацион ўйин кўрсатишимизга тўсқинлик қилдик. Ютқазган бўлсак-да, “Машъал”дан кучсиз эдик деб айта олмайман. Аммо яна стандарт вазиятдан гол ўтказиб юбордик. Негадир сўнгги дақиқаларда йигитлар ўйинни бўшаштириб юборишмоқда. Кетма-кет учинчи мағлубиятимизни тан олган бўлсак-да, қўлимизни туширмоқчи эмасмиз. Бугунги мағлубият учун мухлислардан узр сўрайман. Вазиятни ўзгартиришга астойдил ҳаракат қиламиз. Албатта, олдинда ғалабали ўйинларимиз кўплигига ишонаман», - дейди Азамат Абдураимов.