Яна бир турдан сўнг 2013/2014 йиллардаги Эрон чемпионати баҳслари якунланади.

“Бунёдкор”нинг Осиё Чемпионлар лигасидаги рақиби – Аҳвазнинг “Фулад” клуби сўнгги тур олдидан чемпионлик пойгасида ўз имкониятларини пасайтириб юборди. Узоқ вақт асосий таъқибчиларидан очколар бўйича олдинда келган аҳвазликлар 29-тур доирасида Теҳроннинг “Истиқлол” клубини қабул қилишиб, муҳим баҳсда пойтахтликларга имкониятни бой бериб қўйишди – 0:1. Учрашувда киритилган ягона голга 23-дақиқада Араш Бурхони муаллифлик қилди.

Сўнгги тур олдидан Эрон чемпионати мусобақа жадвалида қуйидагича ҳолат юзага келди: 1.“Нафт Теҳрон” 54 очко (29 ўйин), 2.“Фулад” 54 (29), 3.“Истиқлол” 53 (29), 4.“Пирузи” 52 (29), 5.“Сепаҳон” 51 (29)

29-турдан сўнг “Нафт Теҳрон” ва “Фулад” клубларининг очколари сони 54таданни ташкил этмоқда. Таъкидлаш жоизки, Эрон чемпионати регламентига кўра жамоаларнинг очколари бир хил бўлиб қолса, у ҳолда умумий тўплар фарқига мурожаат қилинади. Ҳозирча “Нафт Теҳрон”да 39-22 (+17), “Фулад”да 35-24 (+11).

Сўнгги турни “Нафт Теҳрон” сафарда “Сепаҳон”га қарши ўтказса, “Фулад” ўз уйида Табриз шаҳрининг “Гостареш Фулад” клубини қабул қилади.