«Реал» бош мураббийи Карло Анчелотти Испания чемпионатининг 33-тури доирасида «Альмерия»га қарши ўйиндан (4:0) кейин жамоасининг чемпионлик йўлидаги имкониятларини чамалади.

«Бугун стадиондаги муҳит жуда ажойиб бўлди. Шунинг учун шахсан ўзим жанубий трибунага бориб, мухлисларга миннатдорчилик билдирдим. Ла Лига – ҳозирда хавфли мусобақа. Барча ўйинлар жуда оғир. Лекин бизнинг мақсадимиз – қолган ўйинларнинг барчасида ғалаба қозониш.

Ҳали кўп сюрпризлар бўлади. «Барселона» ҳали Примерони ютиш учун кучи етишига ишонади ва у охиригача курашади. Каталонияликларнинг мағлубиятидан ҳайрон бўлди. Ҳозир барча ўз мақсади йўлида курашмоқда. "Барселона"нинг "Гранада"га мағлуб бўлгани Испания кубоги финал учрашувига таъсир кўрсатмайди, деб ўйлайман», – дейди Анчелотти.