Олий лиганинг 6-турида "Пахтакор" Самарқандга сафар қилади.
Мавсумни яхши бошлаган "Динамо" ҳозирча 5 ўйиндан кейин 9 очко тўплаган. Равшан Ҳайдаров шогирдлари жамоавий ўйинни тобора кучайтириб боришмоқда. Шу сабабли Самарқанддаги беллашув қизиқарли кечишига шубҳа йўқ. Мезбонлар кўп минг сонли мухлислар қаршисида "Пахтакор"га жиддий муаммо яратишга уринишади. "Динамо" аввалги турда Андижондан 3:2 ҳисобида ғалаба билан қайтганди.
Олий лигада жамоалар 40 марта ўзаро майдонга тушган. Уларнинг 31тасида "Пахтакор", 5тасида "Динамо" зафар қучган. 4 учрашув дуранг билан тугаган. Тўплар нисбати бўйича катта устунлик "шерлар" тарафида - 80:21. Ўтган йилги баҳсларда жамоамиз 4:0 ва 2:1 ҳисобида муваффақиятга эришган. Кахи Махарадзе ҳар икки ўйинда тўп киритган. "Динамо" майдонидаги 20 учрашувда мезбонлар 4 бор зафар қучишган, 4 учрашувда дуранг кузатилган. 12 бор "Пахтакор" ғалаба қозонган.
Ёшлар таркиблари 25 апрель, жума куни соат 15:00да учрашувни бошлашади. Асосий жамоалар эса 26 апрель, шанба куни соат 16:30да Самарқанддаги "Динамо" стадионида ўйинни бошлаб беришади. Беллашувни Марат Исмоилов бошчилигидаги ҳакамлар гуруҳи бошқариб боради. Бунгача Исмоилов "Пахтакор"нинг Фарғонада "Нефтчи"га қарши кечган баҳсини бошқарган ва унда жамоамиз 2:1 ҳисобида ютуққа эришган.
"ДИНАМО" - "ПАХТАКОР"
Ҳакамлар: Марат Исмоилов (Тошкент), Ҳусниддин Шодмонов (Бухоро), Андрей Цапенко (Тошкент вилояти), Суҳроб Сатторов (Қашқадарё).
Назоратчи: Рашид Айтеков (Тошкент).
