Бугун Косонсойдаги “Марказий” ўйингоҳда “Навбаҳор” Жиззахнинг “Сўғдиёна” клубини қабул қилади. Учрашув аввал белгиланганидек, соат 16.30да бошланади. Шу сабабдан “Сўғдиёна” футбол клубининг расмий твиттерида ўйинни соат 16.00га кўчирилганлиги ҳақида тарқатилган хабар ҳеч қандай асосга эга эмас.

Рақиблар шу кунга қадар олий лигада ўзаро 36 марта куч синашишган. 19 учрашувда “Навбаҳор” ғолибликни қўлга киритган бўлса 12 та ўйинда “Сўғдиёна” ютуққа эришган. Бешта қарама-қаршиликда эса кучлар тенг келган. Тўплар нисбатидаги кўрсаткич 64-39, “Навбаҳор” фойдасига. Жамоалар ўртасидаги ўзаро учрашувлардаги энг йирик ҳисоб 1996 йили қайд этилган. Ўшанда "Навбаҳор" Наманганда жиззахликлар дарвозасига еттита жавобсиз тўп киритишганди. Сермаҳсуллик борасида эса 2000 йилги учрашув тарихда қолган. Наманганда ўтган учрашувда 6:3 ҳисоби кузатилганди.

Косонсойдаги “Марказий” ўйингоҳда бўлиб ўтадиган учрашувни Рустам Бобомуродов бошчилигидаги навоийлик ҳакамлар бошқаришади. Бобомуродовга қанотларда Обид Жумаев ва Рустам Самандаров ёрдам беришади. Захирадаги ҳакам сифатида андижонлик Акмал Раҳимов қайд этилган. Вячеслав Валицкий зиммасига эса назоратчилик вазифаси юклатилган.