"Пахтакор" олий лиганинг 7-турида "Локомотив" билан майдонга тушади.
6 учрашувнинг барчасида ғалаба қозонган жамоамиз 4 очко фарқ билан ортда келаётган "Локомотив"га қарши баҳс олиб боради. "Темирйўлчилар" ҳозирча "Насаф" ва "Бунёдкор"га қарши беллашувларда очко йўқотишган. Ҳар икки жамоа сафида дисквалификацияга учраган футболчилар йўқ. Бу эса ўйиннинг янада кескин ўтишини таъминлайди. Чемпионликка даъвогарлар баҳси ҳамиша қизиқарли вазиятларга бой бўлади.
Ўтган мавсумда жамоалар сафарда ғолиб бўлишган. "Локомотив" меҳмонда Холматов ва Карпенконинг голи эвазига ғалаба қозонган. "Пахтакор"га Андреев киритган тўп сафар ўйинида уч очко келтирган. Олий лигада ўтказилган 18 баҳснинг 13тасида "шерлар" зафар қучган. 4 ўйинда дуранг қайд этилган, бир бор "Локомотив" ютуғини нишонлаган. Гол уриш бўйича яққол устунлик жамоамиз тарафида - 46:13.
"Пахтакор" - "Локомотив" баҳсига ташриф буюриб, "Соғлом бола йили"га бағишланган "Омадли мухлис" ижтимоий акциясида иштирок этиш ва турли эсдалик совғаларни ютиб олиш имкониятига эга бўласиз. Чипталарни харид қилиш билан "Омадли мухлис" ижтимоий акцияси иштирокчисига айланасиз. Стадионга ташриф буюрган ишқибозларда 4та футбол тўпи, 4та спорт костюми ва "Fitness House" соғломлаштириш мажмуасига абонемент, Galaxy S4 уяли телефони ва замонавий ноутбук ютиб олиш имконияти юзага келади. Шунингдек, ўйин давомида стадионда турли салқин ичимликлар ва озиқ-овқат маҳсулотлари сотуви йўлга қўйилади. Чипталарни "Пахтакор" Марказий стадиони кассаларидан харид қиласиз. Чипта нархи 2000 сўм.
"Пахтакор" - "Локомотив" ёшлар жамоалари баҳси 2 май, жума куни соат 16:00да "Пахтакор" Марказий стадионда бошланади. Асосий таркиблар беллашуви 3 май, шанба куни "Пахтакор" Марказий стадионида соат 18:30да бошланади. Мухлисларни стадионга чорлаб қоламиз. Мавсумнинг муҳим ўйинларидан бирида "Пахтакор"ни қўллаб-қувватланг ва совғалар ютиб олинг!
"ПАХТАКОР" - "ЛОКОМОТИВ"
Ҳакамлар: Валентин Коваленко (Тошкент), Руслан Самандаров (Навоий), Обид Жумаев (Навоий), Вадим Агишев (Тошкент).
Назоратчи: Алишер Абдуллаев (Тошкент).
