Олий Лига 7-тури доирасидаги марказий учрашув «Пахтакор» стадионида бўлиб ўтади. Унда турнир жадвалининг биринчи ва иккинчи поғоналарида бораётган Тошкентнинг икки жамоаси ўзаро тўқнаш келади.

«Локомотив» айни вақтгача ўтказилган 6 ўйиндан кейин 14 очко билан мусобақа жадвалининг иккинчи ўринни эгаллаб турибди ва «шерлар»га қарши кечадиган ўйин уларга очколар орасидаги тўрт очколик фарқни анча қисқартириб олиш учун яхши имкониятдир.

«Пахтакор» чемпионатнинг ушбу палласигача ҳали очко йўқотганича йўқ. «Темирйўлчилар» эса «Насаф» ҳамда «Бунёдкор» билан дуранг ўйнаб, қолган учрашувларни ғалаба билан якунлаган. «Локомотив» 7-тур олдидан чемпионатда энг кўп гол киритган жамоа бўлиб турибди. Абрамов шогирдлари 6 турда 11та гол урган. Ўз навбатида Абрамов шогирдларининг бу сафарги рақиби энг кам гол ўтказиб юборганини таъкидлаб ўтиш ўринли - 2та. «Локомотив» фақатгина битта гол кўпроқ ўтказган, холос.

Ушбу ўйин олдидан ҳар икки жамоа таркибида ҳам йўқотишлар деярли йўқ. Шунингдек дисквалификация қилинганлар ҳам.

Ўтган йили жамоаларнинг «Пахтакор» майдонида кечган ўзаро баҳсида айнан «Локомотив»нинг қўли баланд келган. Ўшанда Акмал Холматов ҳамда Виктор Карпенко киритган голлар «темирйўлчилар»га ғалаба келтирган.

Шу давргача бўлиб ўтган «Пахтакор»га қарши 18 дербининг 13тасида «шерлар» зафар қучган, 4 бора дуранг қайд этилган. Биттасида «Локомотив» ғалаба қилган.

«Пахтакор»-«Локомотив» ёшлар жамоалари ўртасидаги ўйинда мезбонлар 2:1 ҳисобида ғалаба қозонишди. Асосий таркиблар тўқнашуви эса "Пахтакор" марказий стадионида 3 май, шанба куни, соат 18:30да бошланади.

ОЛИЙ ЛИГА, 7-ТУР. 3 май, соат 18:30
«ПАХТАКОР» - «ЛОКОМОТИВ»
Ҳакамлар: Валентин Коваленко (Тошкент), Руслан Самандаров (Навоий), Обид Жумаев (Навоий), Вадим Агишев (Тошкент).
Назоратчи: Алишер Абдуллаев (Тошкент).