Ўзбекистон футбол федерацияси Терма жамоалар маркази раҳбари Асқар Толибжонов "Спорт" канали орқали эфирга узатилган "Футбол шарҳи" кўрсатувига интервью бериб, мамлакатимиз ёшлар ва ўсмирлар терма жамоаларининг тайёргарлик режалари ва ўртоқлик учрашувлари борасида маълумот бериб ўтди.

Ўзбекистон U22. Бош мураббий - Шуҳрат Мақсудов
Толибжоновга кўра, Ўзбекистон U22 терма жамоаси Осиё чемпионатининг саралаш мусобақасига кўра 7та халқаро ўртоқлик учрашувида майдонга тушишади. Шуҳрат Мақсудов шогирдлари июнь ойида Хитой, июль ойида Эрон, август ойи бошида Саудия Арабистони терма жамоаси билан 2та, августнинг сўнгги 10 кунлигида Иордания билан иккита ўртоқлик учрашувида майдонга тушади. Шунингдек, Рио-де-Жанейрода ўтадиган олимпия йўлланмаси учун курашадиган терма жамоамиз ноябрь ойида Европада 3та ўртоқлик ўйинини ўтказади. Терма жамоамиз 14-18 ноябрь оралиғида Ирландия, Россия ва Европанинг яна бир ёшлар жамоаси билан ўртоқлик ўйинида майдонга тушади.

Осиё чемпионатига саралаш мусобақаси 2015 йилнинг январь ойида бўлиб ўтса, бевосита Олимпиадага йўлланма берадиган 22 ёшгача бўлган футболчилар ўртасидаги Осиё чемпионати эса 2016 йилнинг январь ойида ўтказилади.

Ўзбекистон U19. Бош мураббий - Сергей Лушан
Сергей Лушан бошчилигидаги Ўзбекистон U19 ёшлар терма жамоаси Осиё чемпионатининг финал босқичига тайёргарлик олиб бормоқда. Ёшларимиз ҳам бир қанча халқаро ўйинларда иштирок этишади. Ушбу жамоамиз учун Тошкентда 4та жамоа иштирокида мини-турнир ташкиллаштирилмоқда.

Қитъа чемпионати олдидан бу жамоамиз Таиландда ташкил этиладиган кичик турнирда иштирок этади.

Ўзбекистон U16. Бош мураббий - Темур Олимхўжаев
Ўсмирлар терма жамоамиз шу кунларда Бокуда бўлиб ўтаётган "Каспий кубоги" турнирида иштирок этмоқда. Шунингдек, Олимхўжаев шогирдлари июнь ойининг ўзида 3та жамоа иштирокида Туркияда ташкиллаштириладиган халқаро мусобақада қатнашади. Бундан ташқари, 16 ёшли футболчиларимиз август ойида уммонлик тенгдошлари билан ўртоқлик ўйинида майдонга тушишади.