Куни-кеча олий лиганинг 11-тур ўйинлари бўлиб ўтди. Тошкентда “Бунёдкор” меҳмони бўлган “Нефтчи” жамоаси амалдаги чемпион майдонидан бир очко билан қайтишга эришди. Учрашувда киритилган икки гол охирги 10 дақиқаликда юз берди. Айнан ушбу голлар ўйин суратини безади десак муболаға бўлмайди.

0:1 ҳисобида ортда қолаётган фарғоналиклар 90-дақиқада рақиб дарвозасини ишғол этиб, иродали дурангга имзо чекди. Жамоанинг ушбу ягона голига Муродбек Бобожонов муаллифлик қилди. Ўтган мавсум биринчи лигада “Хоразм” сафида ўйнаб тўпурарлик маҳоратини намойиш этган Бобожонов жорий йил бошида “Нефтчи” таркибига келиб қўшилганди. 20 ёшли ҳужумчи элитада дебют учрашувини 3-турда “Навбаҳор”га қарши ўтказганди.

“Бунёдкор”га қарши кечган баҳсда ҳам бош мураббий уни захирадан майдонга туширди. Леван Гвазавани ўрнини эгаллаган Муродбек Бобожонов учрашувнинг сўнгги дақиқалари ўтиб бораётган бир пайтда, Бугало дарвозаси томон аниқ зарба йўллаб, фарғоналик ишқибозларга олам-олам қувонч тақдим этди.

Кўриб турганингиздек, Мурод Исмоилов томонидан қилинган ушбу ўзгариш ўзини оқлади ва “Нефтчи” якунда Тошкентдан муҳим бир очко билан қайтди. Эътиборлиси, ушбу гол Бобожоновнинг олий лигада киритган илк тўпи бўлди.

Биринчи лигадаги дебют голини ўтган йили “Орол” жамоасига қарши учрашувда киритганини ҳам айтиб ўтиш керак. Бобожоновдан келгуси учрашувларда ҳам голлари билан “Нефтчи” ғалабаларига ҳисса қўшишини кутиб қоламиз.