"Андижон" жамоаси ўз майдонида "Сўғдиёна"га ютқазиб қўйгани боис таббийки мезбонлар бош мураббийи Азамат Абдураимовнинг кайфияти яхши эмасди. Учрашув ҳақида у шундай деди.

— Бугунги мағлубият ва чемпионатдаги омадсиз иштирок учун мухлислардан узр сўрайман. Барча жавобгарликни ўз зиммамга оламан. Ҳамма яхши билади, агар жамоа мағлубиятга учраса бунга бош мураббий айбдор саналади. Албатта, бундай бўлганидан жуда афсусдаман. Энди раҳбарият тақдиримни ҳал қилади. Бир сўз билан айтганда, мен истеъфо беришга тайёрман.

— Ўйин борасида қандай фикрдасиз, бугун жамоага нима етишмади?
— Бугун футболчилар ўйнамади дея олмайман ва улар ҳаракат қилишди. Аммо ҳужумларни гол билан якунлаш маҳорати бизга етишмади. Тўп киритишимиз учун бир қатор вазиятлар бўлди. Бироқ бу имкониятлардан фойдаланишда футболчиларга совуққонлик етишмади. Бундан ташқари бугун ҳимоячиларимиз яна бўш ўйнашлари оқибатида дарвозамиздан иккита тўп ўтказиб юбордик. Яна шуни қўшимча қилиб айтмоқчи эдимки, сафимиздаги бир қатор ўйинчилар олий лига савиясига мос эмаслиги билиниб қолди. Албатта, вазиятни ўнглаш учун таркибни кучайтириш керак. Шунда жамоа олий лигада ўз ўрнини сақлаб қолиши мумкин. Яна қайтариб айтаман, бугун “Сўғдиёна”ни ютиб мухлисларни хурсанд қилишни жуда хоҳлагандик. Лекин натижа бўлмади, шундай экан, бунга жавоб беришга тайёрман.