“Бунёдкор” – “Андижон” учрашувидан кейинги матбуот анжуманининг иккинчи қисмида “қалдирғочлар” устози иштирок этди.

- Мен натижадан ҳам, кўрсатган ўйинимиздан ҳам қониқдим. Бугунги баҳс “Олмалиқ” билан кубок доирасида бўлиб ўтадиган муҳим ўйинимиз олдидан “репетиция” вазифасини ўтаб берди. Машғулотларда олиб бораётган ишларимизни мана шу каби расмий ўйинларда намойиш этиб беришимиз керак. Футболчиларга ҳеч қандай эътирозим йўқ. Бошқача темпда ва бошача талаблар асосида шуғулланишмоқда. Шу боисдан ҳам улар билан янада яхшироқ ишлашимиз керак. “Андижон” ҳақида гапирадиган бўлсам, улар ўйин давомида деярли вазиятлар ярата олишмади. Лекин сўнгги икки ўйинда сўнгги дақиқаларда гол ўтказиб юбориб, ғалабамизни бой берганлигимиз бизни анча хушёр тортиб турди. Ҳозирги ҳолатда натижа биз учун муҳим, - дейди Сергей Иванович.