“Нефтчи” – “Бухоро” учрашувидан кейинги ўтказилган матбуот анжуманининг иккинчи қисмида “Нефтчи” бош мураббийи Мурод Исмоилов иштирок этди. 

"Аввало барча мухлисларимизни ва умуман “Нефтчи”га бефарқ бўлмаган ҳамма инсонларни ғалаба билан табриклайман – дея гап бошлади Мурод Музаффарович. "Бугун қийин бўлди. Давралар оралиғидаги деярли 40 кунлик танаффусдан сўнг бугун биринчи расмий ўйин эди. Бу нарса биринчи бўлим давомида билинди. Ўйинимиз биринчи таймда биз кутгандек чиқмади. Иккинчи бўлимда эса олдинги чизиқни кучайтириш мақсадида таркибда ўзгаришлар қилдик. Бу билан ҳужумкорлик янада ошди. Кўп имкониятлардан унумли фойдалан олмадик. Лекин муҳими керакли натижани қўлга киритдик. 

Турнир жадвалидаги ўрнимиз мураккаб эди. Чунки жамоаларнинг очколаридаги фарқ унчалик катта эмас. Ким ғалаба қозонса, ўша жамоа ўзиб кетиши мумкин. Бугун Худога шукур ғалаба қозониб, ўрнимизни янада мустаҳкамлаб олиш билан бир қаторда олдимиздаги жамоалар билан очколаримиз сонини тенглаштириб олдик. 

Машғулотларда пенальти тепиш борасида ҳам ишлаймиз. Биласизми, бугун агар пенальти содир бўлса, уни Александру Оника тепишини айтгандик. Чунки бунгача бу футболчимиз нуқтадан адашмаётганди. Олдинги ўйинларда, Клецков, Гвазава, Аҳмедовларга ҳам бу борада омад келмаганди. Пенальти бу – лоторея демакдир.

Кейинги турда “Пахтакор” меҳмони бўламиз. Собиқ жамоамга қарши ўйин қизиқарли ва қийин ўтишини тахмин қилиш мумкин. Бу жамоага ҳам қарши жиддий тайёргарлик кўриб, ўзимизни кўрсатишга ҳаракат қиламиз – дейди Исмоилов.