Хабарингиз бор, сентябрнинг охирларида Жанубий Кореянинг Инчон шаҳрида навбатдаги Осиё ўйинлари бошланади. Ушбу мусобақанинг футбол ўйинларига ҳам тайёргарликлар авжида.

Бугун Сеулда матбуот анжуманида Жанубий Корея терма жамоасига турнирда бош мураббийлик қиладиган Ли Кванг Жонг 23 футболчидан иборат таркибни эълон қилди. У матбуот анжуманини: "Бразилиядаги жаҳон чемпионатидаги муваффақиятсизлик аламлари ҳали тарқамади. Биз Осиё ўйинларида фақат олтин медални кўзлаяпмиз", дея очди.

"1 сентябрдан бошлаб барча футболчилар қўл остимда бўлади ва Пажу терма жамоа машғулот базасида тайёргарликнинг охирги босқичига киришамиз. Биз мусобақа ғолиблигини жиддий мақсад қилганмиз. Шу туфайли "Байер Леверкузен"дан Сон Хинг Минни ҳам таркибга қўшишга уриндик. Лекин бунинг иложи бўлмади. Ким Шин Ук, Ким Сеунг Кю (иккаласи "Ульсан") ва Парк Жу Ҳо ("Майнц", Германия) каби 23 ёшдан катталарни танладик. Улар ёзда ЖЧда қатнашишди ва тажрибалари қўл келишига ишонаман. Шунингдек, таркибимиздан Кей-лиганинг кучли футболчилари ҳисобланган Юн Ир Лок ("Сеул"), Мун Санг Юн ("Инчон Юнайтед"), Ким Сеунг Де ("Поханг Стилерс"), Ли Жонг Хо ("Чоннам") каби футболчилар ҳам жой олишган. Бразилиядаги қониқарсиз натижалар бизни ғалабаларга ташна қилди".

Бош мураббий турнирдаги рақиблари ва ғолибликка даъвогар жамоалар ҳақида қуйидагиларни айтди:

"Табиийки, Япония ва доим "бўйнимиздан бўғадиган" араб жамоалари — Ироқ, БАА ва Эрон. Мана шу жамоалар турнир ғолиблиги учун асосий даъвогарлар деб биламан. Ҳа, дарвоқе, бу ёқдан Ўзбекистон бор. Уларда ҳам кучли жамоа бор".

Эслатиб ўтамиз, Осиё ўйинларига тайёргарлик кўриш мақсадида корейслар Сеулда 5 сентябрь куни Венесуэла ва 8 сентябрь куни Уругвай терма жамоалари билан ўртоқлик учрашувлари ўтказиши режалаштирилган.

Отабeк Йўлдошeв
Жанубий Корeя, Сeул