Пойтахтимизда эркин, юнон-рум ва аёллар кураши бўйича катталар ўртасида ўтказилаётган жаҳон чемпионатида эркин кураш бўйича мусобақалар ниҳоясига етди.

Мазкур мусобақаларда ғолиблик учун кураш олиб борган спортчилар орасида Олимпиада ўйинлари ҳамда жаҳон ва қитъавий чемпионатлар ғолиб ва совриндорлари кўпчиликни ташкил этди. Бу эса ўз навбатида ҳар бир беллашувни янада муросасиз ўтишини таъминлади.

Эътиборлиси, саккиз вазн тоифасида ўтказилган беллашувлар якунларига кўра совриндор бўлган спортчилар орасидан ҳамюртимиз Бекзод Абдураҳмонов (-70 кг) ҳам ўрин эгаллади.

Эркин кураш бўйича бўлиб ўтган мусобақаларда 5 та олтин ва 1 та бронза медалга сазовор бўлган Россия терма жамоаси 62 очко жамғариб умумжамоа ҳисобида биринчи ўринни банд этди. Эрон терма жамоаси 45 очко билан иккинчи, туркиялик спортчилар 42 очко жамғарган ҳолда учинчи ўринни эгаллашди (эркин кураш мусобақаларида жами 14 давлат вакиллари совринли ўринларга сазовор бўлдилар).

Бугун аёллар кураши бўйича баҳслар бошланди. Биринчи кун 48 кг., 55 кг., 60 кг., 69 кг. вазн тоифаларида саралаш ҳамда финал мусобақалари ўтказилади.

Мазкур мусобақада Ватанимиз шарафини Даулетбике Якшимуратова (-48 кг), Севара Эшмуратова (-55 кг), Саломат Кучимова (-60 кг) ва Азиза Султонмуродова (-69 кг) ҳимоя қиладилар.