Ўтган турда ўз ҳисобига навбатдаги голини ёзиб Украина чемпионатлари тарихидаги энг яхши тўпурарга айланган ўзбекистонлик ҳужумчи Максим Шацких, ўз рекордидан кўра, жамоаси ғалабаси муҳимроқ эканини таъкидлади.
«Мен рекорд қўйиш ҳақида ўйлаб бошимни оғритганим йўқ. Шунчаки менинг ишим шунақа - голлар уриш, жамоадошларимга пас бериб гол уриш учун ҳиссамни қўшиш», - дейди ўзбекистонлик ҳужумчи ПроФутбол нашрига берган интервьюсида.
«Аввал ҳам айтганимдек, голлар албатта келади. Мана у келди. Мен рекордчига айландим. Бундан ортиғи эмас. Мен учун аҳамиятлиси жамоа айни дамда кутилганидек ўйин намойиш эта олмаётгани бўлди. Турнир жадвалида айни дамда эгаллаб турган ўрнимиз бизни қониқтирмаяпти. Келаси сафар урган голим жамоам ғалабасига ҳисса қўшишига умид қиламан», - дейди Шацких.
Эслатиб ўтамиз, ўтган турда "Зоря" дарвозасини ишғол қилиб Украина чемпионатларидаги голлари сонини 124 тага етказиб олган Максим Шацких, бу борада аввалги рекордчи Сергей Ребровнинг натижасини (123) янгилади ва Украина Чемпионатининг барча даврлардаги энг яхши тўпурарига айланди.
