"Интер" бош мураббийи Вальтер Маццари "А"-серияси доирасидаги "Пармага қарши ўйинда имконият бой берилганининг сабаблари ҳақида тўхталиб ўтди. Мураббийнинг фикрича, ҳамма гап омадсизлик ва жароҳатларнинг кўплигида.

"2:0 ҳисоби ҳаммаси расво аҳволда эканини кўрсатиб турибди. Биз ўзимиз мўлжаллагандек ўйинни мутлақо кўрсата олганимиз йўқ. Бизда вазиятлар йўқ эмасди, Ковачич дарвоза устунини мўлжалга олди, Паласио ажойиб имкониятни кўкка совурди... Биз гол уришда ҳаддан зиёд катта муаммоларга дуч келяпмиз.

Футболчилар деярли алмаштиришларсиз доимий равишда ўйнаётганлари сабаб ўзларида чарчоқ сезмоқдалар. Айниқса жароҳатлар борасида ўта жиддий аҳволда қолдик. Менда ўйинимизга тузатишлар киритиш учун мутлақо имконият йўқ!

Охирги бир нечта ўйинимизда ёмон ўйнамагандик, аммо "Парма" билан учрашувда яна муваффақиятсизликка учрадик. Агар "А"-сериясининг энг чўққисида бўлишни истасак, бу ерда ҳар бир жамоа бизга муаммо туғдириши мумкинлигини ҳисобга олишга мажбурмиз. Нима қилиш кераклигини мен биламан, жароҳатлар баҳона эмас. Биз жамоанинг руҳий ҳолати устида иш олиб боришимиз керак", - деган Маццарининг сўзлари чоп этилган бир қатор итальян ОАВда.