Жанубий Корея Кей-лигасида ҳал қилувчи 4-давра бошланаркан мамлакат чемпиони номи эртагаёқ муддатдан аввал маълум бўлиши мумкин. Ҳозирда 1-ўринни эгаллаб турган "Чонбук" клуби изма-из таъқиб этиб келаётган "Сувон"дан 10 очко илгарилаб кетган.
Агар эртага "Чонбук" сафарда "Жежу Юнайтед"ни мағлуб этса ёки "Сувон" ўз уйида "Сеул"га бас келолмаса, "Чонбук" ушбу мавсум чемпионига айланади.
Бугун "Чонбук" устози Чой Канг Хи "Спортс Чосон" нашрига интервью берди. Бу мураббий ЖЧ-2014 саралаш босқичида Жанубий Корея терма жамоасига устозлик қилганидан хабарингиз бор. Чой Канг Хи бугун:
"Бизнинг мағлубиятга учрашимизни ва чемпион номи ўтган йилгидек сўнгги турда ҳал бўлишини истовчилар бор. Шу билан бирга ҳозирданоқ телефонимга табрикномалар ҳам келиб турибди. Олдинда 4 та ўйин борлиги ва шу ўйиндан 1тасида қозониладиган ғалаба бизни чемпионга айлантиришидан мамнунман. Дарвоқе, “Сувон” қоқилиб, бу жараённи тезлатиши ҳам мумкин.
Шу ўринда "Сеонгнам"нинг ўзбекистонлик футболчиси Сервер Жепаровдан миннатдор эканлигимни чин дилдан айтишни истайман. У 19 октябр куни “Сувон” – “Сеонгнам” ўйинида сўнгги сонияларда “Сувон” дарвозасини ишғол қилиб, бизни 2-ўриндаги “Сувон” билан 10 очколик фарқ ажратишига катта ҳисса қўшди. Айнан шу гол туфайли мен ҳозир сизга хотиржам ҳолда интервю беряпман. Биз ўзимизни енгил ҳис қиляпмиз ва Кей-лигадаги учинчи чемпионликка яқинмиз", дея таъкидлаб ўтди.
Отабек Йўлдошев
Жанубий Корея, Сеул
