"Удинезе" ҳужумчиси Антонио ди Натале фаолияти давомида икки марта "Ливерпуль"га ўтиши мумкин бўлгани ҳақида гапириб ўтди.

"2008 йилда улар "Удинезе"дан Андреа Доссенни олишганида мен ҳақимда ҳам гаплашишган, аммо якунда бундан ҳеч нарса чиқмаганди. Мен тўп сурган жамоаларим орасида у ҳам бўлишини истаганим ягона клуб бу - "Ливерпуль". Стадион ва муҳит - у ерда шунчаки қойилмақом", - деди ди Натале.

37 ёшли футболчи, шунингдек, фаолиятини якунлаш тўғрисидаги фикридан нима учун қайтгани ҳақида ҳам сўзлаб берди.

"Бу мен ва жамоам учун оғир давр эди. Отам жиддий касал, "Удинезе" бўлса олти ўйинни бой берганди. Жамоани қаттиқ танқид қилишарди... Ишлар ёмон кетаётганида қўллаб-қувватлаш керак. Ҳаммаси жой-жойига тушгач, мен қолишга кўндим. Қарорим менга ўзимнинг қай даражада муҳим эканимни ҳис қилишимга ёрдам берган клуб президенти Поццо билан боғлиқ", - деди у.

Қайд этиш керак, жорий мавсумда ди Натале Италия чемпионатида 10 учрашув ўтказиб, 6та гол уришга муваффақ бўлди.