"Челси" бош мураббийи Жозе Моуриньо яримҳимоячи Неманья Матичнинг мавсумда кўрсатаётган ўйинларига алоҳида эътибор қаратиб ўтишни жоиз деб топди.

"У ажойиб ўйинчи. У билан мавсум ўртасида - янги жамоага ўтиш учун энг мураккаб пайтда шартнома имзолагандик. У эса ўзини ҳақиқий гигант сифатида кўрсата олди - бўйининг узунлигини эмас, ўйинини назарда тутяпман. Ўтган мавсум ўртасида жамоамизга мослашув жараёнисиз кириб келди ва ўшандан буён фақат ривожланмоқда.

Мен турли мамлакатларда чемпионатларнинг ғолиби бўлганман ва ҳар доим: "Порту", "Челси", "Интер" ва "Реал"да ўзини жамоа учун фидо қилишга тайёр инсонлар атрофимда эди. Шундай фидойилар ҳозир ҳам ёнимда бор ва шу боисдан ҳам бу ерда эканимдан қониқяпман", - деди Моуриньо.