Рус матбуотида пайдо бўлган янгиликларда айтилишича, 55 ёшли мутахассис Лучано Спаллетти Миланнинг "Интер" клуби бош мураббийлиги учун асосий номзод бўлиб турибди. Унинг янги лавозимда иш бошлаши 12-тур доирасидаги "Интер"-"Милан" учрашувидан сўнг рўй бериши мумкин. Қора-кўклар ушбу ўйинни ҳам бой берган тақдирда жамоанинг амалдаги устози Вальтер Маззари истеъфога чиқарилиши эҳтимоли юқори.

"Известия" нашри манбаларига кўра, "Интер" хўжайини, индонезиялик бизнесмен Эрик Тохир Спаллетти билан аллақачон янги шартнома шартлари бўйича келишиб олган. Спаллетти ҳозир "Зенит"да олаётган йилига 4,5 миллион евро маошининг камайишини истамаяпти. Агар Тохир унинг бу шартига кўнса, итальян мутахассиси А-сериясидаги энг кўп маош олувчи мураббийга айланади. Ҳозир ушбу мақом "Наполи" бош мураббийи Рафаэль Бенитесга тегишли бўлиб, унинг маоши йилига 3,5 миллион еврони ташкил этади. Ундан кейинги ўринда 3,3 миллион олаётган Маззарри қайд этилади.