"Челси"нинг асосий дарвозабони Тибо Куртуа жамоадан кетиши мумкинлиги тахмин қилинаётган Петр Чех ҳақидаги фикрлари билан ўртоқлашди. Бельгияликнинг таъкидлашича, агар Чех клубни тарк этиш имкониятлари ҳақида бош қотираётган бўлса, бу уни ажаблантирмайди.

"Ҳар бир дарвозабон майдонга тушишни хуш кўради. Агар унинг ўрнида бўлганимда, мен ҳам кетишни хоҳлаб қолардим. Чех жаҳоннинг энг яхши дарвозабонларидан бири бўлиб қолаверади, деб ҳисоблайман.

Шубҳасиз, "Челси"нинг ҳозирги ўйинлари ҳақида гап этар экан, кўпчилик бизнинг бутун мавсум мағлубиятсиз одимлашимизга умид қилмоқда. Кўрамиз. Премьер-лига - мураккаб мусобақа. Бир жамоанинг уни мутлақо мағлубиятсиз ўтказа олиши ақлга сиғмайди. Бирорта ҳам ўйинда ютқазмасликдан кўра чемпион бўлиш муҳимроқ", - дея унинг сўзларидан иқтибос келтирмоқда Sky Sports.